【明報專訊】游學修、許賢與蘇致豪創辦的YouTube頻道「試當真」，將於本月26日成立5周年停運。告別前，本月初舉行「白金像獎」頒獎禮，筵開80多席與粉絲聚會道別；告別作《墨魚遊戲2》昨晚首播，近日訂閱人數仍在上升。游學修接受「毛記電視」節目訪問，剖白「試當真」真正死因，透露5年來面對創作、管理與人事問題，難以建立有效規矩，認為公司在這樣的文化下難以持續，選擇結束求解脫。
娛樂組
游學修伙《小薯茄》高Ling、《FHProduction 》熊仔頭，接受東方昇主持的「毛記電視」節目《國家級高峰會》訪問，以 「YouTube Channel末日論」為題展開討論。距離「試當真」停運尚餘個多星期，游學修說不捨，但絕無後悔。網民讚「試當真」近日的影片比之前好看，他笑說：「因為死啦嘛！『人知將死，其言也善』……我哋一齊做緊一件我認為絕對係有意義嘅事，好正，我好享受。呢段時間，就算我啲同事，自己又好，總會仲有些不滿或唔開心，但係會覺得唔緊要啦，完啦，我哋享受埋佢啦。」他稱「試當真」成為某些人眼中的「邪惡軸心」，開台後只有兩三個月蜜月期，之後面對網絡常態，覺得可能以前太搶口或鋒芒畢露。東方昇認為游學修已比從前成熟，「試當真」如繼續營運應該會更好，游學修認同現在多了一份「沉穩」，但頻道不止屬於他、許賢與蘇致豪，是整個團隊、一家人，「你唔能夠好似重組一間公司，有問題就解僱一啲人，如掉咗啲舊嘢咁簡單，我覺得解決唔到」。
想訂規矩 為時已晚游學修認為「試當真」結束，「家人」才會成長，透露這5年面對創作、管理與人事之間的問題難以解決，至今公司仍無規無矩，「訂規矩通常行不通，因會產生好多不愉快，例如返工，我定星期一至五，兩點至六點，唔返唔使病假紙，你有事唔使解釋，喺個group度同我講聲。我先幫佢哋講說話，佢哋唔會6點走人，好多時做到十一二點，甚至通宵，呢個就係YouTube嘅生態。兩點至六點，我expect你唔返或返唔到，至少提早講或嗰日臨時喺group度講，但都會唔講㗎，呢啲就係令我一直有種……不過，佢有佢道理：『喂，大佬，我已經做咗兩晚通宵，我今日唔返一個鐘，你就覺得我唔做嘢？』但係有時規矩就係規矩，所以呢啲位好tricky。我喺未做過老細嘅情况下，行咗5年後，想有規矩，佢唔開心、我唔開心，大家都唔開心，好多呢啲問題。佢哋上心時係好上心，但係佢唔想跟你嘅時候，佢就唔跟㗎啦，當我『臭四』！呢個就係我公司文化囉，行咗5年，你會發現冇乜可能咁樣行10年、20年，一間公司咁樣唔work㗎！」
公司多「藝術家」 拒拍商業片游學修自言身為老闆要處理內部問題，又要面對網上言論，曾有段日子非常不好受，加上要創作頻道內容及演出，覺得再這樣output下去不是辦法，經營第3年開始嘗試放手把工作分給別人，「我唔會話100%唔work，但去唔番嗰樣嘢。頻道、content creator都係跟人，好難一下子放手，搵人返嚟，就唔係嗰樣嘢㗎啦！」他亦提到公司另一問題，「我嗰邊多『藝術家』，就算佢出到嚟，喺網民嗰邊唔達標，佢唔care，view數、like數唔得，亦唔care。有些導演不擅長或拒拍商業片，我要在管理上取平衡」。